Замини модарон. Шаҳзода Самарқандӣ

Модар дар нимрӯзи тобистон канори мазраъа рӯ ба осмон хобида аст. Дар ҳоли ба дунё овардани ман аст. Канораш марди фарбеҳе пасу пеш роҳ меравад ва коре ҳам аз дасташ барнамеояд. Ин райиси колхози мост. Дастони модар ба пояи борики як бута печидааст. Дандон ба дандон гузошта ва на фарёде мекашад ва на оҳе дармеорад. Хуб нест дар ҳузури мард заъфи худро нишон диҳад. Аз райис хоста, дар ҳамин давру барҳо бошад, вале наздик наояд. Хуб нест, мардум ҳарф мезананд. Муҳимтар аз ҳама шавҳараш нороҳат мешавад агар бидонад марди бегонае ин лаҳзаи ҳассоси ҳамсарашро дида аст.