Фарҳанги наввожаҳои тоҷикӣ (вожаҳо нав аз хондаҳо, дидаҳо, шунидаҳо ва дар қиёс сохтаҳо). Пирмаҳмад Нуров

Дар Фарҳанг тақрибан 3500 вожаи нави тоҷикӣ ва маъниҳои луғавии онҳо, ки зимни таҳлили таркиб ва захираи луғавии забони тоҷикӣ аз батни луғатномаву фарҳангҳои дастрас, мушоҳидаҳои шахсии муаллиф нисбат ба ҳодисаву рӯйдоду падидаҳои табиат, таҷрибаи ҳаёт, шунидаҳо, хондаҳо, ҳамчунин зимни сохтани ҳамгунаи тоҷикии истилоҳоти илмию техникии русӣ (англисӣ), гирдоварӣ ва мавриди баррасии умум қарор дода шудааст. Вожаҳои нав дар заминаи вожаҳои асили тоҷикӣ ва баъзан омехта бо вожаҳои маъмули арабиасли тоҷикӣ сохта шудаанд ва имкон дорад ба таркиби луғавии забони тоҷикӣ ворид шуда, онро ғанӣ гардонанд. Дар баробари сохтани баъзе вожаҳои нав, бархе вожаҳои дар шеваҳои тоҷикӣ маъмул низ ба гуфти устод Садриддин Айнӣ «бо сӯҳони қоида суфта ва бо чилбури маънӣ сайқал дода» корбаст шудааст.

Умедворем, ки ин тасмим дар оянда аз тарафи мутахассисони истилоҳсоз ва забоншиносони кишвар идома пайдо хоҳад кард ва бо ин роҳ таркиби луғавии забони тоҷикӣ боз ҳам ғанитар хоҳад шуд.