Муқаддима ба назарияи миллатшиносӣ. Сайфулло Сафаров ва дигарон

Маҷмӯаи илмии «Муқаддима ба назарияи миллатшиносӣ» (Зери назари профессор Сайфулло Сафаров)

Ин маҷмӯаи мақолаҳои илмии олимони ҷавон, ки дар ҳамкорӣ бо Маркази тадқиқоти стратегии назди Президенти Ҷумҳурии Тоҷикистон ба нашр омода шудааст, масъалаҳои назариявии миллатшиносии муосирро дарбар мегирад. Муаллифон дар асоси таҳлили баъзе аз асарҳои назарияпардозони миллат, миллатгароӣ ва давлати миллӣ кӯшидаанд нуктаҳои аслии илми миллатшиносиро, ки дар мактабҳои гуногуни илмии машҳур истифода мешаванд, барои хонандаи тоҷик муаррифӣ намоянд.

Ғояи асосии китоб аз андешаи Президенти Ҷумҳурии Тоҷикистон Эмомалӣ Раҳмон оид ба таҳияи барнома ва дурнамои миллатсозиву давлатсозӣ дар Тоҷикистон сарчашма гирифта, барои мутахассисоне, ки ба ин кор машғул хоҳанд шуд, чун роҳнамои назариявӣ метавонад хизмат намояд.

Маҷмӯа барои сиёсатшиносон, ҷомеашиносон, таърихнигорон, сиёсатмадорон, унвонҷӯён, донишҷӯён ва доираи васеъи хонандагон, ки ба масъалаҳои назарияи миллат, миллатгароӣ ва давлати миллӣ мароқ зоҳир мекунанд, тавсия мешавад.